साइनो बचत तथा ऋण सहकारी संस्थाको सेवा केन्द्र धरमपुर मंगलबारेमा

151

धरमपुर, मंगलबारे (शिबसताक्षी), २४ कार्तिक–झापाको झिलझिलेमा सञ्चालित साइनो बचत तथा ऋण सहकारी संस्था लिमिटेडको सेवा केन्द्र धरमपुरको मंगलबारे बजारमा विस्तार गरिएको छ । शिबसताक्षी–८ झिलझिलेमा मुख्य कार्यालय रहने गरी संस्थाले शिबसताक्षी–२ मंगलबारे बजारमा सेवा केन्द्र विस्तार गरिएको हो ।

आइतबार, मंगलबारेस्थित सेवा केन्द्र कार्यालयको उद्घाटन मंगलबारे बजार व्यवस्थापन समिति अध्यक्ष एबम् उद्यमी व्यवसायी भीम नेम्बाङले गरेका थिए ।

उद्घाटनको अवसरमा कार्यक्रमका प्रमुख अतिथि समेत रहेका मंगलबारे बजार अध्यक्ष नेम्बाङले सहकारी संस्थाले स्थानीयलाई सहकारी संस्थाको उदेश्य, सहकारी संस्थाको सिद्धान्त, शेयर सदस्यहरुलाई सहकारी सम्बन्धी तालिम, गोष्ठी र शिक्षा दिन आवश्यक रहेको बताए । उनले वित्तिय कारोबार मार्फत सदस्यहरुको आय–आम्दानी बृद्धि गर्न, सदस्यहरुको क्षमता विकास गर्दै तालिम सञ्चालन गरेर सीप प्रदान गर्न आवश्यक रहेको औल्लाए ।

धरमपुर गाविसका पूर्व अध्यक्ष तथा नगदेबाली कृषि सहकारी संस्थाका अध्यक्ष बलजीत राईले सहकारी संस्थाहरुबीच व्यवसायिक प्रतिस्पर्धा भएपनि सेवामुखी कार्यमा प्रतिस्पर्धा हुन नसकेको बताए । उनले सहकारी संस्थाहरु नाफामुखी भन्दापनि सेवामुखी हुन जरुरी रहेको औल्लाए ।

शान्ति आधारभूत बिद्यालयका प्रधानध्यापक विष्णुप्रसाद भट्टराईले सहकारी संस्थाहरु लक्षित बर्गसम्म पुग्न नसकेको बताए । उनले पछिल्लो समय सहकारी संस्था ठूला व्यवसायिहरुले नियन्त्रणमा राखेको र आर्थिक रुपमा कमजोर रहेका विपन्न परिवार, सिमान्तकृत जाति वा सममुदायसम्म पुग्न नसकेको बताए ।

सामाजिक तथा राजनीतिक अगुवा गंगाबहादुर (दिपेश) राईले मंगलबारे बजारमा सहकारी संस्थाहरु थपिदै, बढ्दै जानु पनि बजारवासीहरुका लागि ठूले उपलब्धी र प्रगति भएको बताए ।

सहकारी संस्थाका अध्यक्ष दीपककुमार (बिकेन) मेन्याङ्बोको अध्यक्षतामा कार्यक्रम भएको थियो । सेवा केन्द्र उद्घाटनको अवसर पारेर शिबसताक्षी–२ मंगलबारे बजारकी मुटु र कलेजो सम्बन्धी रोगले थलिएका भीमकला अग्रवाल राईको उपचारमा रु ५ हजार सहयोग हस्तान्त्रण गरिएको छ ।

आर्थिक अवस्था अत्यन्तै कमजोर भीमकला राईको उपचारमा सहयोग जुटाउन मंगलबारे बजारका युवाहरुले भीमकला राई बचाउँ अभियान सञ्चालन गरेका छन् । राईको बिराटनगरस्थित बिराट नसिङहोममा उपचार भइरहेको अभियानकर्मी प्रकाश राईले बताए ।

सेवा केन्द्र उद्घाटनको अवसर पारेर संस्थाको विभिन्न शुल्कहरुमा भारी छुटसहित शेयर खुल्ला गरिएको छ । शेयर सदस्य बन्न इच्छुकहरुलाई एक हप्तासम्म शेयर खुल्ला गरिएको सो केन्द्रका संयोजक समेत रहेका संस्थाका उपाध्यक्ष बिशाल शेर्माले बताए ।

उद्घाटको पहिलो दिन एक सय बढीले शेयर खरिद गरेका छन् । शेयर सदस्य बन्न इच्छुक देखाउँदै खाता सञ्चालनका लागि शेयर सदस्य बनेका मंगलबारे सेवा केन्द्रकी व्यवस्थापन ज्ञानु थापाले बताईन् । थापाका अनुसार यो क्रम एक सातासम्म रहेको र यसलाई सदुपयोग गर्न धरमपुरवासीलाई आग्रह गरिन् ।

मंगलबारे सेवा केन्द्रमा एक व्यवस्थापक, एक सहव्यवस्थापक र तीन जना बजार प्रतिनिधिहरु रहने छ । मंगलबारे सेवा केन्द्र मार्फत शिबसताक्षी–३ पाराबारी बजार, वडा नं २ को मंगलबारे बजार वडा नं १ को शुक्रबारे बजारसहित ग्रामिण क्षेत्रमा सेवा दिने छ ।

२०७१ सालमा स्थापना भएको संस्थाले पहिलो पटक मंगलबारे बजारमा सेवा केन्द्र सञ्चालनमा ल्याएको हो । त्यस्तैं, एक महिना पश्चात शिबसताक्षी–६ शिबगञ्ज बजारमा समेत सेवा केन्द्र सञ्चालनमा ल्याउने संस्थाका अध्यक्ष मेन्याङ्बोले बताए । उनले साइनो बचत तथा ऋण सहकारी संस्थाले स्थापनाकालदेखी वित्तिय कारोबारसँगै सामाजिक कार्यमा समेत सेवा गर्दै आइरहेको बताए ।

उद्घाटन कार्यक्रममा पत्रकार निशेष राई (रेडेयो नेपाल), गोविन ल्वागुन (हिमशिखर टेलिभिजन) र सुशन राई (हरपर न्यूज डट.कम) लगायत सामाजिक अगुवा भुवन राई, गोविन्द ढुङ्गानाको उपस्थिति रहेको थियो ।

कार्यक्रममा संस्थाकी प्रवन्धक दिलकुमारी (फागो) मगले संस्थाको तर्फबाट स्वागत मन्तव्य राखेका थिइन् । कार्यक्रमको सञ्चालन अनिलदेब राईले गरेका थिए ।

Facebook Comments
0Shares