विराटनगर, कार्तिक ९ गते । नेपाली कांग्रेस मोरङको जिल्ला सभापति पदका लागि पूर्व काेशी प्रदेश सांसद  सुयर्माराज राई उम्मेदवारी घोषणा गर्नुभएको छ।
नेपाली कांग्रेसका महाधिवेशन प्रतिनिधिसमेत रहनुभएका राईको उम्मेदवारी घोषणासँगै जिल्लाको पार्टी नेतृत्वका लागि आन्तरिक प्रतिस्पर्धा थप रोचक बन्ने देखिएको छ।
नेपाली कांग्रेस मोरङको जिल्ला सभापति बन्ने आकांक्षा राख्ने नेताहरूको संख्या बढ्दै गएको छ। दिलीपकुमार गच्छदार, यदुकुमार विष्टलगायत आधा दर्जनभन्दा बढी नेताहरू सभापति पदका आकांक्षीका रूपमा चर्चामा छन्। यसले आगामी जिल्ला अधिवेशनमा नेतृत्व चयनका लागि प्रतिस्पर्धा हुने सम्भावना बढाएको छ।
कांग्रेसको १५औँ महाधिवेशन प्रक्रियासँगै मोरङमा जिल्ला नेतृत्वका लागि नेताहरूको सक्रियता बढेको छ। क्षेत्रीय अधिवेशनबाट महाधिवेशन प्रतिनिधि चयन भएसँगै जिल्ला सभापतिका सम्भावित उम्मेदवारहरूले आफ्नो दाबेदारी अघि बढाउन थालेका हुन्।
मोरङ जिल्लामा सभापति चयनका लागि ५ हजार ५२ जना मतदाता रहेको विवरण छ। यति ठूलो मतदाता समूहको समर्थन जुटाउनु सभापतिका आकांक्षीहरूका लागि महत्वपूर्ण चुनौती हुनेछ। उम्मेदवारहरूले पार्टीभित्रको समर्थन, क्षेत्रीय प्रतिनिधिहरूसँगको सम्बन्ध र कार्यकर्ताको विश्वासलाई आफ्नो पक्षमा पार्नुपर्ने देखिन्छ।

राई कोशी प्रदेशसभाका पूर्वसांसद हुनुहुन्छ। प्रदेशसभामा काम गरेको अनुभव र महाधिवेशन प्रतिनिधिका रूपमा पार्टीको आन्तरिक प्रक्रियामा रहेको संलग्नता उहाँको राजनीतिक परिचयका महत्वपूर्ण पक्ष हुन्। यद्यपि, उहाँले सभापति पदमा आफ्नो उम्मेदवारी अघि बढाउने क्रममा कस्तो चुनावी रणनीति, प्राथमिकता र संगठनात्मक योजना प्रस्तुत गर्नुहुन्छ भन्ने विषय सार्वजनिक हुन सकेकाे छैन ।
यसपटकको प्रतिस्पर्धामा उम्मेदवारहरूको व्यक्तिगत प्रभावसँगै पार्टीभित्रको गुटगत समीकरण, क्षेत्रीय प्रतिनिधिहरूको समर्थन र आपसी सहमतिले समेत महत्वपूर्ण भूमिका खेल्ने देखिन्छ।
सभापति पदका आकांक्षीहरूबीच सहमति कायम हुन्छ वा निर्वाचनमार्फत नेतृत्व चयन हुन्छ भन्ने विषय भने आगामी राजनीतिक गतिविधिले स्पष्ट पार्नेछ।